نصائح مهمة وانتا بتأسس شقتك

في كام نصيحه لو اتبعتهم بيتك حرفيا هيخطف الانظار ♥

1- البيت كلو لون واحد (فاتح او وسطي ) من الدرجات الحياديه
2- اعمل جبسمبورد فلات في المكان كلو او في الرسبشن والطرقه ع الاقل . والاسقف كلها ابيض صريح او افتح درجات الاوف وايت {jazz white او Reflection )

3_ لما تيجي تعمل چبسمبورد اعمل زوايه الظل او -الشادو جاب- الفنش بتاعها شيك جداا ♥

4- الابواب والشبابيك تتعمل اوف وايت او ابيض بنفس درجه الاسقف . ونوع الدهان لاكيه او دوكو نص لمعه عشان يبقي مقاوم للاتساخ .

5- ارضيه الشقه كلها لون واحد والبلاطه يفضل تبقي ساده او نقشتها هااديه جداا ✌

6- بلنسبه لتوزيع الاناره ف الاسقف احنا مش بنملي الفراغات احنا بنوزع علي حسب مساحات الحركه يعني كل اسبوت او ليد بينور زون هتحرك فيه . عشان مزحمش السقف .

7- لو ف امكانيه لعمل الوزره الڤيوتك او النعله يفضل شكلها بيفخم المكان .

-لوو عملت كل دا هطمن علي اختيارتك ف الفرش والديكور فخد راحتك دا بيتك ♥

شويه نصائح بخصوص الوان الحيطان

فيه مشكله بتقابل ناس كتير .. وهي ان اللون بيتغير ع الحيط عن لما بتشوفه ف الكتالوج
الحقيقه ان الموضوع بيحتاج خبره اكتر من كتر تعدد استخدام الألوان

عشان كده هقولكم بحكم خبرتي بعض المعلومات يمكن تفيد حد أن شاء الله

1️⃣ جاز وايت 7235 :
دا لون من جيون وهو افتح درجات الرمادي يعني نقدر نقول عليه ابيض تلجي

2️⃣ كلاسيك وايت 9918 :
دا يعتبر بعد الجاز وايت ب سنه بسيطه بردو رمادي فاتح جداااا بس زي مقولنا بعد الجاز وايت ب سنه بسيطه

3️⃣ توايلايت 9904 :
دا بقي نقدر نقول عليه رمادي فاتح يعني مش ابيض مكسور ولا حاجه
هو رمادي بس فااتح ينفع ف الغرف ال مفيهاش اضاءه كتير

4️⃣ اكسفورد ريفير 9915 :
دا بقي يعتبر رمادي صريح شويه يعني اللون بتاعه واضح ادامك
يناسب اكتر الغرف ال فيها اسبوتات

5️⃣ ايرون جراي 1032:
دا بقي رمادي غامق ممكن تعمل بيه جنب أو جبسمورد