الفرق بين الڤيوتك والخشب والجبس
الفرق بين الڤيوتك والخشب والجبس
الڤيوتك مصنوع من فوم مضغوط مقاوم للرطوبة والحشرات، ومش هتلاقي فيما بعد شروخ حصلت فيه عكس الجبس تماماً اللي هتلاقي بمرور الزمن حصل فيه شروخ كتير ومحتاج كل شوية يتعالج.
إضافة إلى كدا إن فينش تشطيب الڤيوتك أعلى بكتير من فينش تشطيب الجبس والخشب.
بس للأسف لو البانوهات الڤيوتك اتنفذت واتشطبت بصورة خطأ بيبقى منظرها مقذذ للعين بطريقة بشعة وهتندم إنك عملتها.
ودي شوية نصايح لازم تخلي بالك منها وانت بتعمل بانوه ڤيوتك وبتشطبه:
- قبل أي حاجة ارسم تصميم تخيلي للحيطة اللي هتعمل فيها بانوهات، مش شرط على الأوتوكاد أو 3D Max، لو مش بتعرف تستخدمهم ممكن بإيدك عشان تتخيل الشكل قبل ما يطلع. وزبط أماكن علب الكهربا مهمة جداً عشان مترجعش تفك تاني لو لقيت عود داخلك على علبة الكهربا. كمان لازم توحد أبعادك للصنايعي.
- وانت بتشتري اتأكد إنك بتشتري خامة ڤيوتك مش بيوتك، البيوتك أقل في الجودة بكتير.
- الصنايعي اللي يركبلك لازم يكون شاطر ويشتغل بميزان ليزر. شرط أساسي، أوعى تتغاضى عنه.
- لو مساحة البانوه صغيرة متعملش بانوهين جوا بعض (واحد كبير وواحد صغير)، منظرهم هيبقى مش لطيف. وخلي بالك:
- الڤيوتك الكبير عرض العود بتاعه 4 سم.
- الڤيوتك الصغير عرض العود 2 سم.
- ماتركبش زوايا في البانوه إلا لو كانت مساحته كبيرة. لو صغيرة أوعى تركب بزاوية، اشطف 45°.
- خليك حريص إن الصنايعي وهو بيركب يكون معاه قماشة أو سفنجة مبلولة مية. أول لما يثبت الڤيوتك يبدأ يمسح المعجون اللي جه على وش العواد، عشان لو نشف هيطلع بصعوبة وحلية العود هتبوظ.
- أوعى تخلي النقاش يسحبلك العود معجون أو يصنفره. يلقط بس مكان المسمار حتة معجون على قدها، ولما تنشف يصنفر الحتة دي بس على قدها. باكد تاني: أوعى تخلي النقاش يصنفر لك العود، الحلية هتبوظ ومنظره هيبقى وحش قوي.
- طيب ولو عليه معجون هيتشال إزاي؟
دا ناتج إن اللي ركب الفيوتك ممسحوش وهو طري بقماشة مبلولة مية زي ما قلتلك في رقم 6.
- طيب ولو عليه معجون هيتشال إزاي؟
- وانت بتشطب الدهان، أعواد الفيوتك تبقى نفس لون الحيطة. أوعى تدهن الفيوتك بلون والحيطة بلون.
- أوعى حد يقلك هدهنلك داخل البانوه قطيفة أو أي لون غير لون الحيطة. هتندم لو عملت كدا. باكد تاني: الحيطة وداخل البانوه والأعواد الفيوتك كله يبقى بلون واحد.
- ماتسمعش لحد يقلك هركبلك ستيل ما بين البانوه. دا اسمه عك هندسي.
- آخر حاجة: الجمال بينتج من البساطة. خليك بسيط وانت بتعمل البانوهات. ماتحشيش بانوهات جنب بعضها وفوق وتحت وبانوهات داخلية وخارجية. البساطة أجمل وأشيك وأرق.